जनकपुरमा मिथिला आर्ट ग्यालेरी सञ्चालन

मिथिला चित्रकला व्यवसायको प्रबद्र्धन, व्यावसायी तथा मिथिला कला सँस्कृतिलाई पेन्टिङको माध्यमले विश्वमै स्थापित गराउने उद्देश्यका साथ असोज २६ गतेदेखि जनकपुरमा विधिवत सुनैना मिथिला आर्ट ग्यालरी सञ्चालनमा आएको छ ।

जानकी मन्दिर परिसरमा आयोजित कार्यक्रमबीच जनकपुर उपमहानगरपालिकाका उपमेयर रीता मिश्रले रिवन काटेर विधिवतरुपमा ग्यालरीको उद्घाटन गर्नुभयो । मिथिला चित्रकलामा राष्ट्रिय र अन्तराष्ट्रिय पुरस्कार प्राप्त गर्नुभएका सुनैना ठाकुरले सञ्चालनमा ल्याएको ग्यालरीले पर्यटन व्यवसायीमा सहयोग पुर्याउने उपमेयर मिश्रले बताउनुभयो ।

बेरोजगार महिलाहरुले मिथिला पेन्टिङ गरेर आय आर्जन गर्न सक्नुका साथै सबल हुनेमा आफू विश्वस्त रहेको बताउँदै मिश्रले जनकपुरमा यस्ता ग्यालरीहरु अझै खुल्नु पर्ने धारणा राख्नुभयो । जानकी मन्दिरका छोटा महन्थ रामरोषण दासको अध्यक्षतामा भएको सो कार्यक्रममा मिनापका अध्यक्ष प्रमेश झा, हाँस्यकलाकार रामनारायण ठाकुर, रंगकर्मी बि एन पटेल, गायिका स्मृति मिश्रा लगायत सर्वसाधारणको उपस्थिती थियो ।