» » प्रहरीको सामुन्ने वालविवाह


धनवीर महतो
महोत्तरी, असोज ३० गते । महोत्तरीको भरतपुरमा प्रहरीको आँखाको सामुन्ने दाईजो सहितको वालविवाह सम्पन्न भएको छ ।

गत विहीबार भरतपुर ९ परोडियास्थित शिव मन्दिरमा प्रहरी चौकी कान्तिवजारका असई लक्ष्मी राउतको आँखाको अगाडि एक जोडी वालवालिकाको विवाह सार्वजानिक स्थानमा सम्पन्न भएको हो ।

प्रहरी चौकी कान्तिबजार भन्दा ५ सय मिटरको दुरीमा रहेको शिव मन्दिरमा भरतपुर ६ का १६ बर्षिया सविता महतो र भरतपुर ९ का १६ वर्षीय कृष्ण महतोका बीचमा उमेर नपुग्दै बालविवाह सम्पन्न भएको हो ।

कृष्णका वुवा सत्रुधन महतोले खुलेआम समाजका सामुन्ने सविताका वुवा रामजीवन महतोसँग २ लाख रुपैयाँ दाईजो स्वरुप माग गरेको र सो दाईजो रकम केटी पक्षले उपलब्ध गराएपछि मात्र उनीहरुको बीचमा बाल विवाह सम्पन्न भएको हो ।

आर्थिक रुपमा विपन्न रहेको सविताको बुबा रामजीवनले ऋण लिएर आफनी छोरीको ईज्जत जोगाउनको लागि सो रकम व्यवस्था गरेका थिए । पाँचजना छोरीहरु मात्र रहेको रामजीवनले एकैदिनमा जसरी पनि तत्कालै रकम उपलब्ध गराएपछि सविता र कृष्णको विवाह स्थानिय शिव मन्दिरमा मैथिली संस्कार अनुसार एकैदिनमा सम्पन्न भएको हो ।

कृष्ण र सविताको विवाह नहुञ्जेलसम्म प्रहरी चौकी कान्तिबजारका असई लक्ष्मी राउत पनि घटनास्थलमै थिए ।

दाईजो सहितको वालविवाह हुँदा समेत प्रहरीले सो विवाह रोक्नको लागि पहल किन गर्नुभएन पत्रकारले सोधेको प्रश्नको जवाफमा असई राउतले कही कतैबाट यो विवाह रोक्नको लागि लिखित रुपमा जानकारी नआएकोले आफुले तत्काल केही गर्न नसक्ने प्रतिक्रिया दिएका थिए ।

विवाह हुनुभन्दा पहिले केही समय अगाडि प्रहरी चौकी कान्तिवजारमा केटाकेटीलाई स्थानियवासीको रोहवरमा सम्झाई बुझाई गरेका असई राउतले बताउनुभयो ।

केटा र केटीले कुनै पनि हालतमा आफुहरु छुट्टिएर नबस्ने जनाएपछि उनीहरुको विवाह राजी अनुसार नै भएको असई राउतले प्रतिक्रिया दिनुभयो ।

घटनास्थलमा समाचार संकलनका लागि गएका पत्रकारले स्थानिय वुद्धिजिवी, नागरिक समाज, राजनितीकर्मी, प्रहरी, प्रशासनलाई उक्त विवाह रोक्नको लागि गरिएको हरेक प्रयास विफल भएको थियो । सो विवाह समारोहमा उपस्थित हरेकको मनमा एक प्रकारको नौलो उत्साह र उमंग छाएको थियो ।

गत साउन महिनामा महोत्तरीको टुटेश्वरनाथ महादेव मन्दिरमा लागेको सोमबारी मेला भर्नको लागि गएको समयमा दुवै जनावीच प्रेम सम्बन्ध स्थापित भएको थियो । निरक्षर रहेको सविता र कृष्णबीच मोवाईलको साहारामा उनीहरु वीचको प्रेम दिनप्रतिदिन बढदै गएको र अन्ततः उनीहरुको प्रेम विवाहको रुपमा परिणत भएको स्थानिय रुदल महतोले बताउनुभयो ।

आफुहरुले सविता र कृष्णलाई सम्झाउन गरेको हरेक प्रयास असफल भएको र उनीहरु एक अर्काको विना बाँच्न नसक्ने र छुट्टाए आत्महत्या गर्ने सम्मको चेतावनी दिएपछि वाध्य भएर समाजलाई उनीहरुको विवाह मञ्जुर भएको र विवाह गराउने सहमति भएको महतोले बताउनुभयो ।

यसरी १६ बर्षको कलिलो उमेरमा विवाह हुनु भनेको समाजको लागि भाईरसको काम गरेको र यसले कलिला वालवालिकामाथि नकारात्मक असर पर्ने नागरिक समाज गौशालाका अध्यक्ष दिनेश्वर महतोको कथन रहेको छ ।

समाज एक्काईसौ सताब्दीमा प्रवेश गरिसकेको र समाज परिवर्तनको क्रममा रुढीवादी संस्कार पुनः समाजको स्थापित गर्नका लागि सविता र कृष्णको विवाहले काम गरेको स्थानिय वुद्धिजिवीहरुको प्रतिक्रियाले दिएका छन ।

समाजबाट वालविवाह लगायतका महिला सँग सम्बन्धित रहेको यस्ता घटनाहरु रोक्नका लागि महिलाहरुलाई समेत सचेत हुनुपर्ने आवश्यक रहेको स्थानिय राजनितीकर्मी गोकुल महतोको भनाई रहेको छ ।

यता स्थानियवासीले समाजमा वालविवाह अहिले पनि यथावत रहेको र यस्ता विवाहहरु समाजमा अगामी मंसिरदेखि खुलेआम रुपमा हुने भएकोले सम्बन्धित सरोकारवाला निकायलाई त्यस्ता विवाह रोक्नका लागि चुनौती दिएका छन ।

अहिले एक्काईसौ सताब्दीमा जाँदा पनि वालविवाह अन्त्य हुनुको मधेशी समुदायमा यस्ता विवाहहरु वृद्धि भईरहेको पाईएको छ ।

नेपालको नयाँ संविधान २०७२ को धारा ३९ को भाग ३ को बुँदा नं. ५ मा कुनै पनि उमेर नपुगेको वालवालिकाको विवाह गर्न र गराउन कानुन रुपमा निश्तेज गरिएको छ । यस्तो गरिएको पाईएका खण्डमा कानुन अनुसार कारवाही गरिने व्यवस्था स्पष्ट रुपमा उल्लेख गरिएको छ । तर प्रहरी, वुद्धिजिवी, समाजसेवीको सामुन्ने भएको यो विवाहले कानुन लगायत संविधानको समेत उल्लंघन गरिएको छ ।

About saharatimes patrika

«
Next
Newer Post
»
Previous
Older Post

No comments:

Leave a Reply

..