» » उपेन्द्र यादवले भन्नुभयो, खिलराज रेग्मीकै जस्तो नयाँ सरकार गठन गर्न सकिन्छ


काठमाडौं, साउन ४ गते । संघीय गठबन्धनका संयोजक एवम् संघीय समाजवादी फोरम नेपालका अध्यक्ष उपेन्द्र यादवले अन्तरिम मन्त्रिपरिषदका अध्यक्ष खिलराज रेग्मीको नेतृत्वमा सरकार बनाईएको जसरी नयाँ सरकार गठन गर्न सकिने बताएका छन् ।

राजधानीमा आयोजित एक कार्यक्रममा बोल्नु हुँदै संयोजक यादवले भन्नुभयो, ‘अहिलेको समस्या संवैधानिक होईन, यो राजनीतिक समस्या भएकाले त्यही अनुसार सहमति खोजिनुपर्छ, खिलराज रेग्मी संविधानको कुन धारा अनुसार अन्तरिम मन्त्रिपरिषदको अध्यक्ष भएका थिए त ?’

उहाँले वर्तमान संविधान प्रयोग गर्न लायकको नभएको दाबी गर्दै उहाँले भन्नुभयो, ‘के को २९८ धारा ?, यो संविधान प्राक्टिस गर्न लायकै छैन ।’

‘ओलीले राजिनामा नदिएर लफ्डा गरे उनी पनि डुब्छन अनि पार्टी पनि भड्खालोमा जान्छ, त्यो बाटोमा जानुभन्दा राजिनामा दिए राम्रो हुन्छ, उहाँले भन्नुभयो ।’

प्रधानमन्त्रीले अविश्वासको प्रस्ताव पारित भएपनि नयाँ सरकार तत्काल बन्नै नसक्ने दाबी गरिरहेका छन् नि त भन्ने जिज्ञासामा उनले थपे,‘राजाले राज्य छाड्नुपर्छ भनेर कुन संविधानमा लेखिएको थियो र, जनताले चाह्यो भने जेपनि हुन्छ, देश र जनता नै ठूलो हो ।’

संविधान नै अस्पष्ट भएको उल्लेख गर्दै उहाँले भन्नुभयोे, ‘अहिलेको संविधानले संविधान जारी भएको ७ दिनभित्र प्रधानमन्त्री चयन गर्नुपर्ने व्यवस्था गरेको छ, फेरि ०७४ माघ सातसम्म सरकार रहि रहनेछ भनेको छ, त्यतिमात्रै होईन अर्को निर्वाचन नभएसम्म अर्को सरकारको समेत कल्पना गरेको छैन, त्यसैले यो संविधान पूर्ण अस्पष्ट छ ।’

उहाँले वर्तमान संविधान बमोजिम प्रधानमन्त्रीले संसद विघटन गर्न सक्ने समेत औंल्याए ।

उहाँले काँग्रेस–माओवादी केन्द्रको गठबन्धनमा बन्ने सरकारमा आफूहरु सहभागी नहुने दाबी गरे । उहाँले भन्नुभयोे, ‘सरकारमा जानेको कमी छैन, हामी हतारमा छैनौं, सरकारमा जान हामी लालायित छैनौं ।’

यद्धपी उनले सरकारलाई राजनीतिक रुपमा वर्तमान समस्याको हल गर्ने कुरामा, मुलुकको आर्थिक विकासमा टेवा पु¥याउन र मुलुकको पुनःनिर्माणमा पूर्ण रुपले सहयोग गर्ने विश्वास व्यक्त गर्नुभयो ।

वर्तमान सरकारको बर्हिगमन र नयाँ सरकार बन्ने परिस्थितिले राष्ट्रिय समस्या हल गर्ने अवसर भएको उल्लेख गर्दै यादवले भन्नुभयो, ‘संविधान पूर्नलेखन गर्नु अहिलेको आवश्यकत्ता हो, यसले नै मुलुकलाई निकास दिन्छ, अहिले यो काम गर्न सक्ने वातावरण बनेको छ, यसको उपयोग गर्नु नै बुद्धिमानी हुन्छ ।’

यद्धपी उहाँले अनाहकमा मुलुकलाई अस्थिरताको भूमरीमा फसाएर दक्षिण एशियाकै प्लेग्राउण्ड बनाउने काम कसैले गर्न नहुनेतर्फ ध्यानाकार्षण पनि गराउनुभयो ।

यादवले अब बन्न लागेको सरकारको नेतृत्व गर्नेहरु म्याद गुज्रिएको औषधी जस्तै भएको टिप्पणी गर्नुभयो । उहाँले भन्नुभयो, ‘यी नेताहरुको परीक्षण भइसकेको छ, यिनीहरुले अवसर पाएर पनि केही गर्न सकेनन् ।’

ओली नेतृत्वको सरकार भ्रष्टाचारी र कमिशनखोरहरुबाट चलेको आरोप लगाउँदै उहाँले भन्नुभयो, ‘यो सरकार ढल्नैपर्ने थियो, बरु लामो समय लाग्यो ।’ अहिलेको वर्तमान राजनीतिक परिस्थितिलाई गठबन्धनले राजनीतिक रुपमा उठेका सवालहरुको राजनीतिक रुपमै हल गर्ने अवसरको रुपमा लिएको उहाँले दावी गर्नुभयो ।

यद्धपी ०७ सालदेखि आजसम्म कुनै सरकारले पूरा कार्यकाल व्यतित नगरेकोेले मुलुक अस्थिरताको शिकार बनेको उल्लेख गर्दै यादवले भन्नुभयो, ‘यसका कारण मुुलुक आर्थिक रुपमा अस्थिर, राजनीतिक रुपमा जर्जर र एकपछि अर्को द्धन्द्धमा फसेको छ ।’ उहाँले थप्नुभयो, ‘सरकारको काम सरकार बनाउने र खसाउने भैरहेको छ, त्यसैले अब मुलुकमा राजनीतिक स्थायित्व कायम गर्न सोच्ने अवसर आएको छ ।’

ओली सरकार राष्ट्रवादी भएकै कारण ढाल्न लागिएको भन्ने चर्चाको खण्डन गर्दै उहाँले भन्नुभयो, ‘राष्ट्रियता भन्ने कुरा उखान टुक्का र भाषणले हुने होईन, यो त देश र जनताको हितमा काम गर्नु हो, राष्ट्रिय स्वार्थमा काम गर्नु हो ।’ यादवले ओली राष्ट्रवादी नभएर नश्लवादी नेता बनेको आरोप लगाउनुभयो ।









About saharatimes patrika

«
Next
Newer Post
»
Previous
Older Post

No comments:

Leave a Reply

..